Luckderson Jackson

AKADEMI KREYÒL AYISYEN

Ou se limyè solèy douvanjou

Ou se lawouze k ap pawaze sou tout flè

K ap wouze souvnans lakilti pou bay lespwa Vodou

fòs pou liminen linivè
 

Ou se powèt k ap prezite mo

Ekritè k ap bay prensip pou balewouze

Medyoktite epi aprann nou konn sa w vo

Pou goudougoudou fyète n gaye nan tout sosyete

Ou se pwezi k ap danse sou rèv

pou miyonnen kreyòl nan tout liv

Nou pap okipe kritik degrenngòch

Pou n makonnen avè w manchlong

Ou se nanm kilti lepeyi k ap miyonnen

Satiyèt lespwa pou liminen chandèl

Lanp bobèch k ap klere

Pou limyè solèy kreyòl blayi nan lemonn antye

Mwen m pa nan bridsoukou

N ap pran san n pou n deboutonnen lavni

Epi n ap fè pase bay prezan van

Pou fè n grandizè devan gramè

Dayè se avè w m aprann di manman m bonjou
 

Ou se marasa dosou m

Ou se kreyòl m se kreyòl

Bote w marye ak yon bèl chemiz

Manchlong karabela byen doze
 

Se poutèt sa kale kò w kreyololo

Avèk ou pa gen fèmen bouch

Tout dan griyen byen griyen

Tout moun konprann byen konprann

Blayi rèv ban nou blayi vizyon

Dayè kondi Jòj Kastra ou se bibon m

M ap tòtòt ou san kondisyon

Luckderson Jackson

Posté à 1 nov. 2021