Marie Juliane DAVID

YON 12 JANVYE 2010 

Lakata w fè ta w, nan ginen w tande !

Yon sèl gwo goudougoudou souke tout nannan Pòtoprens. Nan yon bat je, vil la kadav. Nan yon bat je, Pòtoprens tou blanch. Se rèl kay Makorèl ! Yon lame kri «Jezi, Jezi sove m », sòti sou tè monte nan syèl, ateri jouk nan zòrèy Papa Bondye. Yon lame kri « Jezi, Jezi sove m », sòti sou tè monte nan syèl, rive miyonnen kè Papa Letènèl.

Deblozay ! Kay kraze, lekòl tonbe, fakilte tonbe…tout bagay atè plat. Vil la degrenngòch !

Jou sa, mounn mouri tankou grenn lapli. Tèt kase, Bra kase, pye kase, je pete…mounn anba dekonm. Se rèl kay Makorèl !
 

Jou sa, Pòtoprens pran yon gwo pataswèl. Lanati balewouze l je fèmen. Manman pitit mare senti. Se rèl kay Makorèl ! Nan yon bat je, yon latriye rèv detwi.

Nwit lan tonbe. Yon gwo bout fènwa anvayi vil la. Nanpwen zetwal nan syèl la. Pòtoprens chita men nan machwè ap gade kote mouche Lespwa ap sòti. Marilin menm ap chèche ti lanp bòbèch li. Li sonje l te sove ak li, men l pa wè l.
 

Douvanjou leve. Vil la pa chanje koulè. Yon radmare moun anvayi plas piblik yo. Vil la plonje nan yon mizè manchlong. Kou bridsoukou sa kite Pòtoprens san vwa !

Marie Juliane DAVID

Posté à 1 nov. 2021