Aurelie PIERRE

NOU VLE VIV !

Nou vle viv malgre sitiyasyon peyi a, malgre lamizè, ensekirite ak lavi chè deside miyonnen ak nou.

Goudougoudou pase li ale ak tout sa nou posede, tout sa ki chè pou nou yo, li kite nou ak rèl, lanmò epi dlo nan je. Nou nan yon peyi degrenngòch, lè w ap fè mal yo aplodi w, lè w ap fè byen yo pran w pou egare.

Nou vle viv, men lavi nou san sans. Bridsoukou nou pèdi idantite n, nou pèdi tout valè nou, nou vle sanble ak ti blan epi pou sa nou prè pou nou fè nenpòt tenten. Nou tout bezwen a la mòd, on mòd kap trennen nou dèyè l ak yon kòd k ap toufe nou.

Douvanjou nou te konn leve ak kè kontan pou n al travay, kounya se chita fè tripotay. Pale sou do moun tounen metye. Rezo sosyo tounen kay nou ak tablo kote n ekspoze tout lavi nou. Lekòl tounen pwogram. Kawoutchou, gazlakrimojèn, wòch, kouri se pakapala. Alekile se vakans manchlong !

Nou vle viv men nou pa gen espwa. Nou chita bra kwaze, men n ap espere peyi a ap chanje. Slogan nou se; depi l bon pou nou zafè lòt yo. Nou wè enterè nou, nou pa wè moun. Nou sispann gen rèv paske se jou nou wè a nou konte. Nou pa konn sa demen ap pote. Peyi lòk, kidnaping, gang, vyolans sou tifi, gaz, tout se vokabilè nou !

Lanp bòbèch Ayiti a twò fèb se sa ki lage nou nan BLACKOUT ! Men Lespwa sou kè nou !

Aurelie PIERRE

Posté à 1 nov. 2021