« Lang kreyòl : zouti rezistans pèp ayisyen »

Jedi 31 oktòb 2024 la, Sant Kiltirèl Pyepoudre te gen onè resevwa Rosilia Francois Corneille, vis-prezidant Akademi Kreyòl Ayisyen (AKA), ansanm ak Ileus Papillon, yon powèt ak sosyològ, pou yon pale-ak-jèn ki te rasanble anviwon swasant elèv ak jèn sou tèm : « Lang kreyòl : zouti rezistans pèp ayisyen »

Rankont lan te kòmanse ak yon rapèl sou istwa Akademi Kreyòl Ayisyen an, ki te kreye an aplikasyon atik 213 nan Konstitisyon 1987 la epi ki te fonde ofisyèlman an 2014, avèk misyon pou nòmalize ak pwomouvwa lang kreyòl la. Akademi an estriktire an kat ògan epi li mennen divès aktivite tankou fòmasyon jounalis, estandadizasyon òtograf kreyòl la, e li pibliye de rezolisyon : yonn an 2007 ak lòt la an 2023.

Entèvenan yo te kontinye ak istwa lang kreyòl la, ki sòti nan melanj kilti fransè, panyòl ak afriken, pandan yo te montre kijan li mare ak istwa lit pèp ayisyen an. Yo te pale tou de premye tèks ki te ekri an kreyòl e ki te fè pati literati ayisyen an, ki make yon etap enpòtan pou lang nan.

Oratè yo te ensiste sou enpòtans pou nou pa janm kite pèsonn fè nou rejte lang manman nou.

Piblik la te patisipe aktivman, poze divès kesyon, epi pale-ak-jèn nan te fini nan yon atmosfè kote tout moun te santi yo alèz ak nan kè kontan.

Posté à 11 nov. 2024