Baudelaire JN JAQUES

LANMOU SANZATANN
 

Yon kout lanmou bridsoukou

Tanble kè m kou goudougoudou

Ki lakòz l ap fè zikap chak jou

K ap briding mwen chak kou
 

E tankou w sot jis azouboudou

Pou w vin reveye m douvanjou

Nan mitan somèy mwen san fè rèv

Mwen m ap pran w san rezèv

Klewonnen nan zòrèy mwen prèch ou

Miyonnen m pou m liminen lanp bòbèch ou

Pou m boule tout mèch ou

Jouk ou rive tire flèch ou

Gen lavni menm nan yon chanm nwa

Chaje anvi pou yon lòt fwa

Kifè m pyafe chak fwa

Ayayay ! Ou djayi lespwa
 

M te degrengòch ou mete m landrèt

M te mòlòlò, ou mete m drèt

Sanzatann ou balewouze tout pè m

Menm si bajou kase m vle pou w prè m
 

Ann efase tout dout

Pou n al fonn nan yon lòt monn

M ap kenbe w kout kout

Paske n pral fè yon pakou manchlong

Baudelaire JN JAQUES

Posté à 1 nov. 2021