Tatiana FLEURANTIN

LAKANSYÈL

Li jou men li pa bonè,

Tan mare sou tèt rèv mwen yo

Loray mizè gwonde tèlman fò,

Zeklè parès ap fè m filalang

Lapli dezespwa kòmanse nwaye chak grenn lide ki vle boujonnen anndan m.

Fè nwa kòmanse djayi sou demen m,

Limyè etenn nan tout koridò lespwa m

Sèl avèk yon lanp bòbèch, m ap eseye trase chimen.

Nan yon peyi degrenngòch,

Kote rèv fleri sèlman nan dòmi menm si w vle plante yo je klè.

Solèy potko leve,

Bridsoukou yon lakansyèl kòmanse taye banda l nan syèl mwen,

Chak grenn koulè sekwe nanm mwen tankou goudougou !

La pou la, li balewouze lespri m, li miyonnen kè m

Siy pou m kontinye kenbe manchlong ak lavi

Pi bonè se petèt gran maten,

Menm si li pa bonè,

Kite m chèche douvanjou demen m nan lanjelis lavi.

De tout mannyè, li pa konn fè kado.

Randevou kase pou m kouche ak manzè lavi !

Pou m satiyèt li,

Pou m woule tete l

Pou m karesse l

Jis mwen fè rèv mwen yo sòti vini nan mitan fant janm lanati.

Tatiana FLEURANTIN

Posté à 1 nov. 2021