Kendy Calixte (Rickey MaigrePlume)

Lanmou FOU

Goudougoudou w fè m pèdi nanm

Ou miyonnen anvi m tankou se flanm

Ti kont degrenngòch byen dwat

Balewouze anndan kè m dwat,

rèv foumi se pou l papiyon

espwa genyen w pa yon madichon,

Tèt bòbèch mèt kanpe nan mitan nou

Mwen avè w ap janbe lento douvanjou

M ret kanpe devan pòt kè w manchlong

Bridsoukou Lanmou frape pòt kè m

Se lanmou fou

Ki fe m genyen w

kòm bon bòn

Menm lè m pa gen gaz

Nou pap rate yon jou

San nou pa met sik sou bonbon n

Ou se yon bon baz

Ki ekri mwen « lanmou »

Anfas ou m pa menm ka fè yon bon fraz

Yon bon fraz ki louvri pòt

Premye fwa mwen avè w te kontre

Lang mwen te lou

Tèlman ou nan sans mwen

Ou mache nan san mwen

Ou se kreyòl mwen
 

Kendy Calixte (Rickey MaigrePlume)

Posté à 1 nov. 2021