Daphney FENELON

VAN LESPWA SOUFLE

Mwen pa konnen w twò lontan, men m tande jan zansèt yo ap klewonnen jan ou se yon fanm vanyan, yon fanm djanm ki sakrifye l pou pitit li yo ka viv kè pòpòz nan lanmou,

konsyans ak yon diyite manchlong, sa rive pitit ou yo manje manje bliye, yo bliye sa w vo,

yo vin viv degrenngòch, yo pa pran ka w, yo menm vire do ba ou, sanble yo gen tan bliye

tout peripesi w te pase pou yo ?

Bridsoukou, m santi m toumante, m delala, bagay sa vire tout lòlòj mwen lè m sonje kijan w te konn miyonnen yo, kijan w te konn fè san sot nan wòch pou yo, poukisa kounya yo pa

sispann balewouze w ak imilyasyon, desepsyon ?Goudougoudou, abite tout zantray mwen. Mwen sekwe lè m wè kijan w depafini, yo met ak lènmi w yo pou yo fè w tounen zosman.
 

Douvanjou feblès kwape m, nanpwen fòs pou m tchyenbe, ni kontinye menm lè solèy la

vire bonèt li, men sa pa anpeche m sonje demen, gen yon vwa ki di m, sa ka miyò.

M limen lanp bòbèch, mwen liminen nan lide pou mèt lavi a, lanati voye je gade soufrans

nou, paske m santi w soufri twòp, dlo nan je w koule pou sa w pa t travay, m pa nan plas

ou, men, m wè kalamite w ap pase, sa fè m febli plis chak jou.

Kwè m, m anvi rewè w fleri bèl fanm, m vle w souri, si w konn kijan sa fè m lapenn,

dèfwa m doute de yo, èske se fwi zantray ou yo ye vrèman ?

Malgre m t ap soufri m pa t sispann karese gwo rèv sila a, m te ret konfyan, doulè w

gen pou fini, lanati w ap fè m reviv lespwa sa a, mèsi paske w ap pèmèt wozo lavi m kanpe.

Daphney Fenelon

Posté à 1 nov. 2021