TI KOUT JE SOU :

Pierre Gérôme Pradel Pompilus

Wè jou 5 out 1914 nan vil Akayè, lwès peyi D'Ayiti. Aprè li fin boukle etid segondè li, Pradel Pompilus etidye dwa. li diplome epi genyen lisans dwa li nan lane 1936. Nan menm ane sila a, li vini pwofesè fransè ak laten nan lise : "Alexandre Pétion, Toussaint Louverture Pòtoprens'' ak "Sant Etid Segondè", kote li se youn nan manm fondatè yo, avèk plizyè lòt kòlèg li tankou: Jean Claude, Pierre Riché, Lesly Manigat, Max Chancy ak Marie Lucie Chancy.

Aprè dezyèm gè mondyal la, Pradel Pompilus jwenn yon bous pou ale etidye fransè avèk syans sosyal Sòbòn, nan peyi Lafrans (1945-1947). Li resevwa diplòm pou lisans li nan "lèt klasik" epi kontinye ansenye laten avèk grèk ansyen.

Nan lane 1950, li nome sou-sekretè d'Eta nan Edikasyon Nasyonal peyi D'Ayiti anba lobedyans jenn militè Franck Lavaud, Paul Malgloire ak Antoine Levelt.

Soti 1950 pou rive 1958, li dirije Lekòl Nòmal Siperyè, nan Pòtoprens.

Nan lane 1955, Pradel Pompilus pibliye yon liv ki rele: "Pages de littérature haïtienne".

2 lane aprè, an 1957, li retounen nan peyi Lafrans, pi presizeman nan vil Pari, kote li ale prepare Dotora fransè li Sòbòn. Se te pou li yon bèl okazyon pou li te etidye avèk kèk gran espesyalis lengis fransè nan epòk la tankou : Charles Bruneau ak Georges Gougenheim. Tèz li nan pwosesis etid sila a te chita sou "Haïtianisme" epi genyen pou tit "La langue française en Haïti". Tèz la te pibliye Pari, nan "Institut des hautes études d'Amérique Latine" nan lane 1961, epi Pradel Pompilus diplome Doktè Ès lèt.

Nan lane 1958, li pibliye yon leksik kreyòl-fransè, tèz konplemantè, nan edisyon "Université de Paris". Li patisipe ak zanmi lengwis Pierre Vernet nan sansibilize popilasyon ayisyen an sou enpòtans kreyòl kòm patrimwàn lengistik nasyonal.

Nan lane 1960, Pradel Pompilus nome pwofesè nan inivèsite leta peyi D'Ayiti, kòm anseyan literè fransè epi espesyalis Pierre Corneille, Jean Racine, Molière, Voltaire ak Victor Hugo. Epi li dirije depatman lengistik, laten avèk literati na inivèsite a. Li te ansenye tou nan fakilte Etnoloji avèk Sant Lengistik Aplike.

Nan lane 1961, li patisipe nan rekonesans ofisyèl kreyòl ayisyen an kòm dezyèm lang ofisyèl peyi D'Ayiti.

Nan lane 1970 yo, li pibliye plizyè liv ki konsakre ak kreyòl avèk yon latriye atik nan divès revi. Espesyalis nan lengistik konpare (kreyòl/fransè), Pradel Pompilus kontribye nan etid konpare fransè ak kreyòl.

Sou sijè enpòtan sila a, Pradel Pompilus deklare :

"Le créole représente à mes yeux plus qu'un simple procédé pédagogique, mais un moyen d'opérer la réconciliation avec nous-mêmes, susciter le respect de nous-mêmes, gage du respect des autres... ce que je défends dans ce livre, c'est, au-delà un vrai bilinguisme, l'unité et la solidarité nationale sans quoi il n'y a pas de vrai développement".

Nan lane 1964, li fè yon etid kritik sou Oswald Durand, an 1972 sou Etzer Vilaire, an 1976 sou Louis Joseph Janvier, epi an 1990 sou Anténor Firmin. Li ekri kèk paj tou sou travay Léon Laleau, Carl Brouard, Coicou, Jean Price-Mars, Emile Roumer ak Frankétienne.

Depi 7 oktòb 1985, kòmanse genyen "Semaine linguistique" ki fè omaj a Pradel Pompilus.

Gran gason sila a mouri pòtoprens jou ki te 27 fervriye 2000 lan, men li rete youn nan pi gwo defansè alafwa kreyòl ayisyen an kòm patrimwàn lengistik nasyonal epi defansè lang fransè a kòm patrimwàn literè epi mwayen kominikasyon entènasyonal nan Frankofoni.

Zèv Pradel Pompilus pibliye :

Pages de littérature haïtienne, imprimerie Théodore, Port-au-Prince : 1955
Lexique créole-français, thèse complémentaire, Universitaire de Paris 1958
Contribution à l'étude comparée du français et du créole : Volume I, phonologie et lexique; Volume II, morphosyntaxe, Éditions Caribéennes, Port-au-Prince: Vol 1 :1973 et Vol 2: 1976 (en collab avec Raphaël Berrou), Histoire de a littérature illustrée par les textes, Éditions Caraïbes, Port-au-Prince, Volume 1 et 2 : 1975 et volume 3 : 1977
La langue française en Haïti, Édition Fardin, Port-au-Prince: 1981
Manuel d'initiation à l'étude du créole, Éditions impressions magiques, Port-au-Prince: 1983
Anthologie des grands auteurs, ouvrage posthume rédigé entre 1996 et 1999(5)

Sources : Ïle en île | Wikipédia

Posté à 4 nov. 2021