Sarah Germain

Bridsoukou

Yon krèy lafimen leve

Bouche solèy lavi

Balewouze moso lespwa

ki te konn miyonnen

chak maten douvanjou.

Lagè n rate!

Vil la pote koulè dèy

Grèv manchlong kont malèpandye,

nou pa sispann plante sèkèy,

San n se tafya bòbèch,

Vil la pran fòm simityè.

Degrenngòch

Tèt anba

Bourèt rèv nou chavire.

Sou tout kous

Souf nou kout

Silans bouch peze pawòl kè n

Jemisman bouche Doulè n.

Goudougoudou bwote lavi

Avyon n tonbe li pa ateri

Chak grenn ki ale kote n

N a vlope kò yo mete nan mòg kè n

Epi lèse nanm yo nan lapèn.

Sarah Germain

Posté à 1 nov. 2021