Thamar Vilsaint

KONSA

Konsa…

Nou t ap chache miyonnen lavi

Piti piti li t ap fleri

Sou gran chimen nou te plante

Tout lespwa n, nou t ap rekolte

Lè bridsoukou, move tan pase

Li balewouze mezi sa n posede.

Nou sispann dòmi pou n reflechi

Men jwenn yon repons pou istwa n sanble pa fasil

Pwoblèm agoch, pwoblèm adwat se preske rezime lavi n

Depi douvanjou jouktan solèy kouche.

Nou fòse ri tankou timoun ki chaje ak rèv

Jis pou tèt nou pa pati, men an reyalite nou pèdi gou lavi.

Hmm, istwa n chaje periperisi manchlong

Nou konn gou tout mizè lanati ak tout kalte kriz sosyal.

Kòm siklòn pa fin touye n goudougoudou pap efase n tou

Menm si sapat nou degrenngòch

N ap fòse vanse pou pi devan ak yon lanp tèt bobèch kenbe nan men n

Menm si nou bouke…

Thamar Vilsaint

Posté à 1 nov. 2021