TI KOUT JE SOU AGASE LESPERANS

Kòmantè woman Agase Lesperans yon zèv Lyonel Trouillot

Yon woman rete yon zèv literè, yon zèv kote objektif lotè a se siprann , choke lektè a pi plis nan chak liy , nan chak paj. Se vre zèv la ka toujou mache men nan men ak limajinasyon men sa pa anpeche li pote ban nou: yon seri reyalite, yon seri fenòmèn, yon seri pratik k ap bwase bil sosyete a chak jou, kote reyalite  sa yo kapab fè objè kenpòt etid syantifik.

Nan Agase Lesperans Lyonel Trouillot mete nan wonn listwa twa jenn fanm k ap evolye nan twa espas sosyal depaman youn ak lòt (Agase Lesperans, Jowàn ak Valeri ).

Agase Lesperans se yon non nou ta kapab konpare ak yon latriye mo tankou: Kouraj, Lespwa…

Se vre pèsonaj la te fèt nan yon kontèks difisil kote manman l ak papa l pa t vle l. Poutan Agase se pèsonaj ki fè fas ak mwens peripesi, espas kote Li ap evolye te gen mwens kontrent pou yon fanm.

Jowàn se deskripsyon anpil fanm nan sosyete nou an , kote lavi pa fè yo kado, esperyans yo sèvi yo fòs pou yo lite. Pèsonaj la se yon fanm ki pa pot pantalèt li pou bèl twèl, tout rèv li se wè pitit li (kouzin li )sa lavi an ba li an reyalize rèv li yo , depi aprè lanmò matant li, li te vin jwe wòl sa petèt se paske matant li te resevwa l epi trete l tankou pitit li aprè lanmò manman l. Pèsonaj la se yon fanm djanm ki konprann antanke fanm li dwe goumen plis nan yon sosyete kote fanm ap sibi tout kalte malvèsasyon.

Valeri se pèsonaj ki te gen plis kontrent, se pèsonaj tou ki pa t janm eseye chanje sa l ap viv poutan se sèl pèsonaj ki te leve nan yon fanmi rich kote li pa t manke anyen ki gen pou wè ak materyèl. Espas sa kote l ap evolye se yon espas kote medam yo pa gen pou bay opinyon yo, yo jis gen pou kontante yo depanse lajan san poze kesyon. Se yon espas egoyis kote byennèt youn pa konsène lòt. Se yon espas medam yo ap sibi vyolans (vyòl ) depi yo tou piti anba Je tout moun, pyès nan yo pa denonse sa a.

Twa listwa, twa pèsonaj, twa fanm, yo pa konprann lavi yo ak wòl yo antanke fanm menm jan nan sosyete a. Zèv sa, se deja  yon pretèks anplis pou nou kontinye reflechi sou lavi ak wòl fanm nan sosyete a.

Posté à 27 avr. 2024